نیویارک ۔ 27 ستمبر (اے پی پی) وزیر اعظم عمران خان آکھیے جوکشمیر دے مستقبل دا فیصلہ کشمیری عوام کرنڑاں اے ، کرفیو اتے پابندیاں چاونڑ دے بعد مقبوضہ خطے اچ خونریزی دا ڈر اے ، عالمی برادری کوں کشمیر دی صورتحال تے توجہ کرنڑ دی ضرورت اے ،عالمی قیادت تے میڈیا دے ذریعے وی کشمیر دی تازہ ترین صورت حال بارے ڈسائے ،30سال اچ لکھاں کشمیریاں کوں شہید کیتا گے ،بھارت اچ رہنڑ آلے کروڑاں مسلماناں کوں وی مشکلات دا سامنڑاں اے ،دنیا اچ منی لانڈرنگ روکنڑ کیتے سخت قانون بنڑاونڑ دی ضرورت اے ،مدینہ دی ریاست جدید ترین ریاست ہئی ، نبی کریم ساریں توں پہلے فلاحی ریاست دی بنیاد رکھی۔پاکستان توں پیسہ چوری کرتے باہر دے ملکاں اچ رکھیا گیا ، اے گال انہاں ایشیا سوسائٹی دی تقریب نال خطاب کریندے ہوئیں آکھی اے ۔ وزیراعظم آکھیا جو میڈا ملک کیتے اوہو وژن اے جیرھا جو پاکستان بنڑاونڑ آلیں دا وژن ہئی ۔مدینہ دی ریاست اچ سارے مذہب دے لوکاں کوں ہکو جہے حقوق حاصل ہن ۔غلاماں توں خاندان دے لوکاں دے طور تے سکول کیتا ویندا پئی ،قانون دی بالادستی اچ ہی حکمران جوابدہ ہوندے ،پاکستان اسلام دے ناں تے وجود اچ آیا ۔پی ٹی وی دے مطابق وزیراعظم آکھیے جو قانون دی حکمرانی مہذب اتے غیر مہذب معاشرے اچ تمیز کریندی اے ،ہک سوال دا جواب ڈیندے ہوئیں آکھیے جو اگر تساکوں تجاری گھاٹے دا سامنڑاں اے تاں مشکلات دا سامنڑاں کرنڑاں پوندے اساں یاف بی آر کوں بہتر بنڑاونڑ کیتے اقدامات کریندے پیوں کیوں جو ملک اچ بہوں گھٹ لوک ٹیکس ڈیندن ایندے کیتے ٹیکس دے نیٹ اچ ودھارا کرنڑ وڈا چیلنج اے‘ ملک توں غربت مکاونڑ ترجیح اے ،وزیراعظم آکھیا جو بھارت 80لکھ مسلماناں کوں کشمیر اچ محصور کر رکھیے ، 53 ڈینھ توں کرفیو نافذ اے ۔فروری اچ شروع تھیونڑ آلی پاک بھارت کشیدگی اچ ودھارا تھے وزیراعظم آکھیا جو دورہ امریکہ دے دوران عالمی رہنماواں کوں مقبوضہ وادی دی صورتحال دا ڈسائے ، عالمی برادری کوں کشمیر دی صورتحال تے توجہ کرنڑ دی ضرورت اے ۔عالمی برادری کوں موسمیاتی تبدیلی دے چیلنج دے نال کشمیر اچ انسانی المیہ تے وی توجہ ڈیونڑیں ہوسی۔نائن الیون دے بعد پاکستان تے دہشت گردی دی جنگ مسلط کر ڈتی گی اے ۔وزیراعظم عمران خان آکھیا جو دہشت گردی پاروں پاکستان اچ سیاحت دا شعبہ متاثر تھئے ۔سیاحت کیتے پاکستانی ویزے دا حصول اوکھا تھی گیا ہئی پاکستان دے شمالی تے پہاڑی علاقے خوبصورتی اچ بے مثال ہن ،سیاحت دیاں بہوں ساریاں جہیں دریافت کیتن ۔وزیراعظم عمران خان آکھیا جو سیاحت دے شعبے دے بہتری دے نال ہک لکھ سیاہ پاکستان آئے ،پاکستان اچ سیاحت ودھاونڑ کیتے ای ویزے دے سہولت شروع کیتی جڈاں جو پاکستان اچ مذہبی سیاحتی مقامات موجود ہن ۔وزیراعظم عمران خان آکھیا جو قائداعظم عظیم شخصیت ہن کڈاہیں اصولاں تے سمجھوتہ نہ کیتا جڈاں جو پیشہ ور سیاستداناں دا کوئی نظریہ کائنی ہوندا ایں کیتے ہرگال تے سمجھوتہ کر گھندوں۔
